المساعد الشخصي الرقمي

مشاهدة النسخة كاملة : اضاءات قانونية - الحلقة الاولى - الاهلية المدنية في القانون الاردني



أحمد أبو زنط
08-07-2010, 01:50 PM
http://www.youtube.com/watch?v=9ZSnkg9IUis

http://www.youtube.com/watch?v=R81_YkwIfyk&feature=related

http://www.youtube.com/watch?v=sVtde3n7lyM

أحمد أبو زنط
08-07-2010, 01:57 PM
اهلا وسهلا فيكم اعزاءنا المستمعين بحلقة جديدة من برنامجنا المميز (ثقافة قانونية) .. ثقافة قانونية هو البرنامج القانوني الأول الذي يعرض باسلوب شبابي مميز يهدف الى نشر الوعي القانوني الحياتي بطريقة جديدة وحصرية .
حلقة جديدة تحمل في ثناياها عبرة مفيدة هي العون الأكيد لك في حياتك العملية ..

على امتداد هذه الحلقة سنتعرف سويا على مشكلة حياتية قد تصادف ايا منا في حياته الفعلية وذلك من خلال الدراما او الاسكتش الذي سَيُعرض بعض قليل .. بعدها سننتقل الى تعليق قانوني بسيط ومرح على مجريات الدراما نستخلص من خلاله العبر والمعلومات التي تصنع من حياتنا اكثر فهما .. يرافقنا خلالها الاضاءات الاكثر اهمية في موضوع حديثنا والتي تندرج في المسجات القانونية اثناء النقاش ..

واخيرا نختم مع الفقره المميزة الخاصة بفريق عملنا القانوني LawJO .

انا عيسى العماوي وزميلي في هذه الحلقه هو احمد ابو زنط

موضوع حلقتنا لهذا اليوم سيكون تحت عنوان:


الاهلية المدنية


ننتقل سويا اعزائي المستمعين الى فقره الدراما مع كل من ردينا خليفات وهدى بيدس .

.. استـماعا ممتعـــا ..

●عيسى : والله يا احمد شكله هالردينة وقعت وما حد سمى عليها ..

احمد : قصدك انه الـمصاري والموبايل راحوا عليها .. وانه البياع رح يرغمها تدفع الباقي؟

●عيسى : اه ولا ؟ مش هيك يا ابو القانون ؟

احمد : لأ مش هيك يا عيسى لانه ردينا قاصر .. يعني بين قوسين غير مميزه .

●عيسى : طيب وشو يعني ؟ ما هي اشترت والتزمت .

احمد : مممممممممم .. لازم تعرف قبل ما ابلش اشرح لك انه في عنا بالقانون اشي اسمه اهلية وهالاهلية هاي بتنقسم لثلاث مراحل اساسية خلينا نسمعهم من خلال الاضاءة القانونية التالية :

م43 + م44 + م45 (مدني)

●عيسى : ول ول ول .. شو هذا ؟ فهمني وحده وحده .. انا اسمعت أعمار وأشياء جديده علي .. شو يعني فاقد التمييز ؟ وشو يعني مكتمل الاهلية ؟ وشو يعني مميز ؟
احمد بصراحة مش فاهم اشي ..

احمد : ولا يهمك يا عيسى احنا هون لنشرح هاي الامور كلها ..

●عيسى : يعني رح تفهمني ؟؟

احمد : رح افهمك بس اسكت ..

●عيسى : هههههه امرك سكتت ..

احمد : زي ما سمعنا بالاضاءة القانونية قبل شوي عرفنا انه في 3 حالات رئيسية بتحكم حاله الاهلية .. وانا لما احكي اهلية بقصد فيها مقدره الانسان على اكتساب الحقوق وتحمل الالتزامات .. مع الاشاره انه في حقوق اساسية للانسان ما بتتاثر بالاوضاع الي رح نحكي عنها بعد شوي والي بنسميها بالقانون اهلية الوجوب اما الي رح نشرحه بعد شوي هو اشي اخر اسمه اهلية الاداء والي بتتأثر بعاملين هم السن والادراك العقلي .. وعلشان ما اطول وانا بحكي فاقسام الاهليه هي :
1- تحت عمر الـ7 سنوات بيكون الانسان بالقانون فاقد التمييز وكمان بيكون فاقد للتميز اذا كان معتوه او مجنون .
2- الحالة الثانية والي بيكون فيها عمر الانسان بين الـ7 سنوات والـ18 سنة وفيها بيكون الانسان مميز او بنسميه صغير مميز وهاي الحالة بتشمل ايضا كل من السفيه وذو الغفله .
3- اما الحالة الثالثه والاخيره والي فيها الانسان بيكون مكتمل الاهلية بعد تجاوزه لعمر الـ18 عام من دون ان يكون مصاب باي من الاختلالات العقليه سابقه الذكر والي هي العته والجنون والسفه والغفله .


●عيسى : اها .. معلومات جديده علي .. يعني على هيك ردينا وهدى كونهم خلصوا الصف العاشر .. يعني تقريبا 15- 16 سنة هم بنظر القانون صغار مميزين ؟؟ صح ؟

احمد : صح يا عيسى ..


●عيسى : طيب ، احمد انت فهمتني وما فهمتني .. موضوع الاعمار انا فهمته .. بس شو الفرق بين المجنون والمعتوه والسفيه والمغفل ؟ مش كلهم نفس الاشيء ؟؟


احمد : ممممممم هالسؤال دائما بينطرح .. وفعلا هالمفاهيم كلها قريبة من بعض بالحياه العاديه .. لكن قانونيا كل واحده من هذه المصطلحات تمثل حاله او موضع مختلف .. مش رح اشرح التفاسير الفقهية القانونية والاصطلاحية الخاصه فيهم لكن بشكل مبسط .. رح احكيلك انه المعتوه والمجنون والي بنظر القانون هم فاقدين الاهلية ، هم الاشخاص الي ما بيكون لهم قدره على اتخاذ قراراتهم لانهم مش بوعيهم .. وبالفتره الي بيرجعوا فيها لوعيهم بنحاسبهم زيهم زي مكتملي الاهليه اذا كانت اعمارهم فوق الـ 18 سنة .

●عيسى : كثير حلو .. وبسيط . طيب والسفيه والمغفل ؟

احمد : امرك يا سيدي ، السفيه هو الشخص الي بيصرف امواله بشكل غير مدروس وساذج وبتحسه بينضحك عليه .. مثلا هو مستعد يدفع 100 ضعف ثمن السلعة بدون ما يدرك انه وقع بامر مش صحيح .
اما المغفل .. فهو الانسان الي من السهل نضحك عليه لطيبة قلبه مثلا من دون ما يكون فيه مرض بعقله ..
وهالحالتين هذول بيدخلوا بنطاق الصغير المميز ..

●عيسى : كمان حلو .. بس بصراحه مش فاهم شو سر هالمقدمة هاي .. انا سألتك سؤال واضح وصريح ، ردينا كيف بتقدر ترجع فلوسها ؟؟

احمد : يا عيسى والله رح اجاوبك .. بس جوابي مرتبط بالي حكيته قبل شوي .. الله يعين حسام كيف باقي متحملك ، هو من اشي قليل خلاني اقدم الحلقه بداله اليوم ..

●عيسى : هههه الله يسامحك يا احمد .. تفضل احكي .

احمد : ولو اني عارف انك ما بتقدر تظل ساكت بس رح استغل فتره سكوتك واحكي انه القانون جعل جميع الاشخاص بشكل مبدئي قادرين على ابرام العقود ما لم تسلب اهليتهم او يحد منها بحكم القانون .

●عيسى : رجعنا نحكي حكي ما بفهمه .. شو دخل الاهليه وما بعرف شو بقصتنا ؟

احمد : والله عارف انك ما بتقدر تظل ساكت .. يا عيسى الاهلية الي سبق وشرحناها مطلب يجب توافره حتى ينعقد العقد صحيح ويكون قابل للتطبيق والي بنسميه بالقانون (النفاذ) .. وحتى يكون العقد صحيح نافذ ويرتب جميع اثاره لازم يكون الي ابرم العقد شخص مكتمل الاهليه يعني عمره اكثر من 18 سنة في حال كونه اردني .. لانه سن الاهلية بالقانون الاردني هو 18 سنة .

●عيسى : ايوه ايوه فهمت عليك .. زي كانك قاعد بتحاول تقلي انه ردينا كونها صغير مميز لانه عمرها 15 سنة بتحكمها ظروف اخرى .. وبالتالي ممكن العقد تبعها يكون ولا اشي وترجع مصاريها ؟

احمد : بتعجبني لما تفكر .. ايوه هيك اشي .. ولانك بلشت تفكر اسمع هالاضاءة القانونية الي رح يخليك تفهم اكثر :
م 117 + م 118

●عيسى : بتعرف كاني بلشت شوي افهم ..
- يعني الصغير غير المميز والي حكينا انه بيكون عمره تحت الـ7 سنوات كل تصرفاته باطله .
- اما تصرفات مكتمل الاهلية فاحنا متفقين على انها صحيحه نافذه .
- بس قصة الصغير المميز والي بيكون عمره بين الـ7 سنوات والـ 18 سنة مش فاهمها .. شو يعني ضار ضرر محض ونافع نفع محض ؟ شو يعني دائر بين النفع والضرر ؟ صراحه مش فاهم .

احمد : كثير كويس يا عيسى ، بالفعل الصغير غير المميز كل تصرفاته باطلة ومكتمل الاهلية تصرفاته صحيحه نافذه اذا توافرت بقية شروط العقد والي رح نحكي عنها بحلقات قادمه ان شاء الله ..

●عيسى : طيب والصغير المميز ؟

احمد : يا زلمة ما هيني بحكي ..

●عيسى : احكي بس ما تظل تشوقني ..

احمد : علشان ما نشوق السيد عيسى .. فالصغير المميز بيحكم تصرفاته 3 ظروف اساسية ..

●عيسى : والي هي ؟


احمد : والي هي يا عيسى :
1- ان يكون تصرفه نافع نفع محض .. مثل حصوله على هبة وهيك الذمة المالية الخاصه فيه رح تزيد وهون تصرفه بيكون صحيح نافذ .
2- الحالة الثانية والي بيكون فيها تصرفه ضار ضرر محض .. مثل انه يقوم هو بالتبرع لاحدهم وهيك ذمته المالية بتنقص .. وهون تصرفه بيكون باطل .
3- اما الحالة الثالثة والاخيره ، والي فيها بيكون تصرف الصغير المميز او من هو في حكمه دائرة بين النفع والضرر .. والي هي بتمثلها امور المعاوضه .. زي لما يشتري بضاعه .. في هاي الحالة بنلاحظ انه هو حصل على البضاعة وفقد بدالها نقود .. لكن ما بنقدر نحكي انه ذمته المالية تأثرت لانه هو فعليا ما خسر النقود .. وبهاي الحالة بتكون تصرفاته موقوف على اجازة الولي .. او موقوف على اجازته نفسه عند بلوغة سن الرشد .

●عيسى : يعني لما ردينا اشترت خاتم كان تصرفها دائر بين النفع والضرر ، صح ؟

احمد : بالضبط .

●عيسى : يعني بما انه ردينا بحكم الصغير المميز وتصرفها زي ما شرحت لي دائر بين النفع والضرر فانت زي كانك بتحكي لي انها بتقدر ... مممممممممم بس لحظه شوي ، شو يعني موقوف ؟ هاي ما فهمتها ؟

احمد : لانك ما بتستنى على الواحد يشرح ، عموما العقد الموقوف هو احد انواع العقود والي كمان ما رح نخوض بتفاصيله الآن والي بتكون اثاره موقوفه على تحقق امر معين وهالامر هون هو اجازه الولي او اجازه القاصر نفسه بعد بلوغة سن الرشد .

●عيسى : اها فهمت عليك .. يعني بامكان والد ردينا حسب الدراما الي سمعناها باول الحلقة ينهي العقد ويسترد المال الي دفعه وردينا ترجع الخاتم للبائع ؟

احمد : صحيح يا عيسى مع ملاحظة انه اذا اختار والد ردينا فسخ العقد لازم الخاتم يرجع للبائع صاغ سليم زي ما تم تسليمه والا بندخل بامور اخرى هي مش موضوعنا الآن .

●عيسى : شكرا الك يا احمد ، جد عرفتني بكثير اشياء .. بس زي كاني سمعتك بتحكي انه الـ18 سنة هي مرحله البلوغ بالقانون الاردني .. ليش هي القوانيين الثانيه غير عنا ؟

احمد : نقطة كثير مهمة يا عيسى ، بالفعل في قوانيين غير عن الاردن بمجال سن الاهليه .. حيث يكون سن الرشد في بعض الدول 20 او 19 او 21 او حتى اكثر من هيك .. فسن الاهلية مش موحد بكل الدول .

●عيسى : مممممم طيب واذا واحد من دولة ثانية سن الاهلية فيها غير عن الاردن اجى وابرم عقد في الاردن وبعدين صار بده يفسخ العقد مع انه عمره بالاردن اكبر من سن الاهليه .. شو بنعمل ؟

احمد : خلينا نحكي بالارقام يا عيسى علشان نفهم .. انت قصدك انه (س) من الناس اجى على الاردن ليكمل دراسته مثلا وكان عمره 19 سنة.. وكان سن الاهلية ببلده 21 سنة مثلا ، وراح هذا الشخص عمل عقد بيع وبعد هيك اجى الولي وطلب فسخ العقد كونه ابنه لسة تحت ولايته .. هيك قصدت ؟

●عيسى : ايوه هيك .. شو العمل هون ؟

احمد : شو رأيك نسمع مع بعض الاضاءة القانونية الثالثة بهالحلقة وبعدين بنحكي .
م12/1 (مدني)


●عيسى : مممممم ليش بتطلع فيني .. تخافش مش فاهم ولا اشي هههه

احمد : غريب بعرفك شاطر .. عموما يا عيسى زي ما سمعنا بالمسج قبل شوي فالمادة 12 من القانون المدني الاردني بفقرتها الأولى جعلت سن الاهلية بالنسبة للاجانب يخضع للدولة الي هم بينتموا الها اصلا .. وفي حاله صار في خداع بموضوع الاهليه يعني اظهر الشخص انه كامل الاهلية وهو ليس كذلك من باب الخداع وفي مجال التعاملات الماليه .. فهنا القانون الاردني بيعتبره اهل لهذا التصرف بشرط انه ما يكون من السهل على الطرف الاخر كشف عيب الادعاء بالاهليه .

●عيسى : يعني بمثالنا السابق الاب بيقدر يفسخ عقد الابن الي عمره 19 سنة اذا كان الابن مش مخبي انه مش مكتمل الاهليه ؟

احمد : بالضبط يا عيسى ..

●عيسى : احمد بعرف اني جننتك اليوم .. بس تسمحلي بسؤال اخير قبل ما ننتقل لفقره LAWJO ؟

احمد : تفضل اسأل ؟


●عيسى : انا سمعت مره انه في ناس بتكون اعمارهم تحت الـ 18 ومع هيك بيتصرفوا تصرفات الشخص مكتمل الاهليه .. وبيقدروا يبيعوا ويشتروا بدون ما يكون للولي امكانية الفسخ .. فشو قصتهم هذول ؟ على راسهم ريشه مثلا ؟

احمد : ههههه لا مش لانه على راسهم ريشه .. هذول اسمهم بالقانون الصغير المأذون ، وهم إلي الولي او الوصي تبعهم بيعطيهم اذن لممارسه بعض الاعمال .. ولما يمارسوا هاي الاعمال بيكونوا زي كانهم مكتملي الاهليه تماما .. بالتالي ما بنطبق عليهم ضمن نطاق الاذن احكام الصغير المميز .. فهمت يا عيسى ؟

●عيسى : ايوه فهمت .. اصلا انا بعرفها من زمان بس بدي اجربك .

احمد : واضح -___-

●عيسى : بمزح معك يا زلمة .. بالعكس شكرا كثير للمعلومات القيمة الي قدمتها لنا بهالحلقه .. انا من يوم وطالع رح اصير اركز اكثر على موضوع الاهليه علشان ما اوقع بالغلط .

اعزاءنا المستعمين بننتقل الآن سوية لفقره LawJO مع زميلتنا نانسي العتوم لنشوف شو محضره لنا بهاي الحلقه ....




عيسى: اعزاءنا المستمعين قبل ما نختم فقره اليوم .. رح اطرح السؤال الي دائما بستناه ..
بهيك بنكون وصلنا لنهاية حلقتنا لهذا اليوم ..
بنشكر كل من ساهم في انجاز هذه الحلقه من فريق LAWJO
وعلى رأسهم الاستاذ المتدرب احمد ابو زنط
واكيد بنشكر هدى بيدس وردينا خليفات الي بيجهزوا لنا دائما اسكتشات حلوه
وما بننسى اكيد يوسف المومني قارىء المسجات الي بتنور لنا طريق الحلقه
واكيد زميلتنا نانسي العتوم بمقتطفاتها الرائعة من موقع LawJO.net

والشكل موصول بالتاكيد للكادر الفني باذاعة الجامعة الاردنية ..

هذا محدثكم عيسى العماوي .. نشوفكم على خير ان شاء الله بحلقه قادمة .

مصعب
08-07-2010, 04:14 PM
بصراحة لا يمكننني إلا أن أبدي إعجابي بل وأرفع طاقيتي لكم تقديرا لمجهودكم .....

بصراحة أعجبتني طريقة الطرح واختيار الموضوع وعرضه بلغة بسيطة مفهومة ....

متابع بشغف

شيماء المومني
08-08-2010, 10:27 AM
خطوة فريدة من نوعها .. سيروا و الله يرعاكم :(89):

صفاء الايمان
08-08-2010, 01:44 PM
تحفة استمرو

رودي له له له بس يعني مش شايفة الخاتم رخيص هعهع
يلا تعيشي وتتعلمي يما


يسلمو ع هالمعلومات الرائعة ^_^
تخصصكم مميز بحكيها للمرة المليون
بالتوفيق لالكم كلكم كلكم كلكم

rodyna khliafat
08-08-2010, 07:25 PM
رودي له له له بس يعني مش شايفة الخاتم رخيص هعهع
يلا تعيشي وتتعلمي يما
يعني تركتي كل اشي وركزتي ع السعر فعلا انك ***** ههههههههههههههه

صفاء الايمان
08-10-2010, 10:50 AM
هو بيني وبينك شكلو الخاتم محرز ههههههههه
لا عمي ان شاءالله بصحلك بتهديني احلى منه وماله بستاهل

رودي رودي صحلي اسمع صوتك واعرفك يلا بالتوفيق

ALA'A ALHADIDI
08-17-2010, 09:43 AM
كتير حلووووووو
احلى اشي " عيسى بتعجبني لما تفكر" هههههههههههههه

الله يعطيكم العافية

Essa Amawi
08-17-2010, 04:57 PM
هههههههههههه
دائما مقموع انا هههههههههههه

ALA'A ALHADIDI
08-18-2010, 08:44 AM
يا حرام يا عيسى... بتحزن هع هع
خلص انا ما بقمعك ,شايف شو الاء منيحة

صفاء الايمان
08-25-2010, 01:16 PM
في سؤال غبي خطر ببالي
بحسب ايش بحسبو العمر بالقانون
باي تاريخ وفي تدقيق ولا لا ؟ يعني الاشهر بتنجبر هع

صفاء الايمان
08-25-2010, 01:17 PM
و المجنون والمعتوه والسفيه والمغفل

مرة قرات متل محاضرة كاملة عنها كانت اول شي بقرا عنه بالحقوق
هالمحاضرة هي يلي خلتني اغير نظرتي للحقوق

Essa Amawi
08-25-2010, 03:15 PM
العمر بينحسب بناء ً على تاريخ الميلاد المسجل في شهادة الميلاد/ هوية الاحوال المدنيه

والاشهر لا تجبر
بل وحتى الايام

صفاء الايمان
08-25-2010, 05:33 PM
اهااا
ولا بالواسطات !

Essa Amawi
08-25-2010, 05:42 PM
اعطيني مثال
لاحكيلك فيه او ما فيه !

صفاء الايمان
08-25-2010, 05:46 PM
لا بس سؤال خطر ببالي
ما عندي امثلة

rodyna khliafat
08-25-2010, 07:10 PM
الله يخليكِ يا صافي
ولو انتِ بتستاهلي اكتر من هيك بس بكفي انك جوهرة واحلى الماسة

صفاء الايمان
08-25-2010, 07:42 PM
تسلمي
!! بس لشو هالمدح ولا هالذم

ahmad asqalan
08-25-2010, 10:33 PM
انا البياع اللي انجبرت ارجع المصاري

ضحكتو عليه

و الاحلى من هيك عيسى معتبرني كومبارس

rodyna khliafat
08-26-2010, 10:47 AM
صفاء ما رح ارد عليكِ

صفاء الايمان
08-26-2010, 12:56 PM
معك حق رودي
---
عسقلان احمد له له له
بس بياع شاطر
شو ترجع البضاعة بعد ما تااخدها باحلامها
طيب يا قوم في محلات بتحط انه البضاعة غير مستردة !!
او يلي بطلع ما برجع بس بتبدل مرات
!!

Essa Amawi
08-26-2010, 05:32 PM
احمد هههههههههههههههه
هص ^^
============

اها صفاء في محلات هيك بتكتب
بس اذا اتطبقت عليها الشروط القانونية رح يرجعها بقوه القانون حتى لو هو كاتب ^^

صفاء الايمان
08-28-2010, 08:33 PM
شكرا للافادة
اذا برضو القانون لا يحمي المغفلين
يعني بحال البياع ما ضاف هيك شرط ما بقدر يتحايل ع الزبون

00000
سؤال شو نوع التنسيق يلي بتستخدموه للخط عجبني ^^ قريب لخط النسخ
رائع
بانتظار المزيد

Essa Amawi
08-28-2010, 11:41 PM
لأ لأ ما فهمتيني
انا كنت قاصد البياع
يعني اذا توافرت الشروط القانونية الي بتخليه يرجع الي باعه (مثلا حالة الغش او التغيرير مع الغبن او الغلط او الاكراه .. الخ) فالبياع بيرجع البضاعه او بيدفع تعويض او الاثنين معا حتى لو كان كاتب انه البضاعه لا ترد ولا تستبدل
وهو من حيث الاصل فحتى لو البياع ما حط هذا الاشي جوه محله (انه البضاعه لا ترد ولا تستبدل) فالقانون بينصره بهذا المجال .. لانه العقد تم وانعقد ^_^

==========

اي خط بتقصدي ؟

صفاء الايمان
08-29-2010, 12:50 PM
ايواااا
هسا افهمت
حلوو
ذكروني بهالاشيا بس افتح محلي
====
يلي مكتوبة فيه المقدمة
كتنسيق بين الخطوط شو اسمه
شوي بلا كثرت غلبة هسا بشوفه

صفاء الايمان
08-29-2010, 12:53 PM
[FONT=Diwani Letter]

ييي دورت عليه بين الخطوط ما لقيته !!!
:(157):
مش مشكلة بس بحب هالخط :(241):