المساعد الشخصي الرقمي

مشاهدة النسخة كاملة : مساء الخيـــــــر



مروه
07-08-2009, 10:30 PM
مسائكن مكلل بالفل والنرجس ... طبعا هلأ سجلت بالمنتدى كنت عم ابحث عن الخطط الدراسية للحقوق فعجبني كتير المنتدى .... والله متحيرة كتير كتير وبدي حدا يساعدني
انا طالبة توجيهي وجبت الفصل الأول 90.4 وحابه ادرس حقوق بس ما في قبول من يلي حواليه ...

مروه
07-08-2009, 10:40 PM
ما في حدن يساعدني .... يا الله عم تحيروني كمان

Essa Amawi
07-08-2009, 10:40 PM
اهلا فيكي اخت مروه ^_^
منوره معنا

كيف ممكن نساعدك ..

معدل التنافس للحقوق في الأردنيه يتراوح ما بين 86-89

بنصحك تقرأي هذا الموضوع لمزيد من الاسترشاد حول الحقوق كتخصص
http://www.lawjo.net/vb/showthread.php?t=2337

وبامكانك تزوري ركن اسئله المقدمين على الدخول للكليه من هنا وتطرحي الي بدك اياه
http://www.lawjo.net/vb/forumdisplay.php?f=34


اي مساعده بخصوص الحقوق او الالتحاق بالكليه .. او اي سؤال داخل الجامعه الاردنيه
فاحنا جاهزين للاجابه ان شاء الله

عيسى عماوي - فريق موقع طلاب كلية الحقوق - طالب قانون سنة 2
امنياتي ^_^

مروه
07-08-2009, 10:50 PM
يسلمو كتير الموضوع حلو كتير وحاس كل الاشيا يلي فيه بتنطبق علي انا واكتر ....
وبتمنى ادخل الجامعة الاردنية وتخصص حقوووووووووووق يا رب ... ادعولي
بس يلي عم يدائني انو في ناس من قرايبنا عم يعارضو دراستي لهاد التخصص مع انه عم اقنعن بس ما في فايده .. بشكرك من كل البي

Essa Amawi
07-08-2009, 11:05 PM
الله يسلمك يا رب ^_^

للاسف مجتمعنا فاهم انه المحاماه عباره عن نصب او كذب او خداع ..

الي حاب اقوله انه الي بده يكذب او ينصب او يخدع بيقوم بكل هاي الشغلات بدون ما يكون محامي

بيستغرب الناس كيف مرات تطبق احكام غير عادله او غير واقعيه .. وبينسوا انه القانون اداه لسلامة المجتمع واستقرار المعاملات وليس دوما اداه لتحقيق العداله المطلقه ..

اذا بحكي لو تفهمي المعارضين لك هاي النقطه كثير رح تستفيدي

البعض الاخر بيحكي انه الحقوق تخصص ما بيلبق للبنات ..

انا بقلك انه اكثر من 2/3 من الكليه هم اناث تقريبا
بالاخير مو شرط تستغلي محاميه
مجال القانون كثير واسع وشامل

بتقدري تشتغلي قاضيه
مستشاره قانونيه
موظفه قانونيه
قانونيه بواحده من المنظمات الدوليه
... الخ من الاعمال التي لا تنتهي


اذا انت فعلا حابه التخصص بنصحك بشكل جدي انك توضحي للمعارضين وجهة نظرك هذه .. لانه الي بيكون متحمس لاشي بيبدع فيه حقا ^_^
واحنا بدنا بالكليه الاشخاص المبدعين امثالك ^_^


امنياتي لك .. واي مساعده تريدينها داخل نطاق الجامعه الاردنيه - حتى لو ما دخلتي الحقوق - رح يكون الفريق كله جاهز لتلبيتك ^_^ .

مروه
07-08-2009, 11:29 PM
عن جد شكرا كتير لالك حكياتك كتير مقنعين وحلوووين كمان
المشكله يلي عم يعارضوني خوالي (2 محامين ) وواحد مستشار قانوني
بس انا رح اعمل يلي شايفته بيناسبني وبحققلي امنياتي
وطبعا الحقوق رح يبرز شخصيتي اكتر من هلأ وانا بصلح لكون محامية ودائما بأول لمامتي ::: انا خلقا لكون محامية وسوف ابقى كما عهدتموني على الجد والاجتهاد والمثابرة ... وان شاء الله رح حقق حلمي وطموحي بالمحاماه وحلم ماما وبابا .... تسلمولي كلكن يا حق

Essa Amawi
07-08-2009, 11:34 PM
اهلا فيكي وتسلمي يا رب ^_^

اهم شيء نرضي ذاتنا ونسعى لتحقيقها ^_^

بالتوفيق يا رب

^_^

مروه
07-08-2009, 11:38 PM
ان شاء الله
كنت حابه اسأل الحقوق خمس سنين ولا اربعة .... كيف فيني اسجل بوزارة العدل لكون من قضاة المستقبل ازا عندك فكرة بهاد الموضوع

Essa Amawi
07-08-2009, 11:42 PM
اهلا فيكي من جديد

الحقوق اصلا 5 سنوات
لكن معظم الطلاب تنهيها خلال 4 سنوات
وبشده حيل بتخلص بـ 3سنوات ونص

=================

بخصوص برنامج قضاه المستقبل
فهم قبل بدايه العام الجامعي بينشروا اعلانات بالجرايد
تابعي الصحف الرسميه وان شاء الله خير

==================

؛؛ انا حاليا عن اذنك ^_^
<<< سيتم نقل الموضوع الى قسم اسئله السنة الاولى والمقدمين على دخول الكليه ^_^

YoUSeF MoMaNI
07-09-2009, 12:14 AM
في البداية اسمحي لي بالترحيب فيكي بموقع طلاب كلية الحقوق
من خلال قرائتي للموضوع المطرح من خلالك لاحظت انه انتي حابه دراسه القانون ومعدلك بالتوجيهي عالي ما شاء الله عليكي وهالاشي فيه معارضه من خوالك القانونيين
بما انه انتي حابه تدرسي هالتخصص فأكيد رح تبدعي فيه والقانون كثير حلو مو شرط بالاخر تطلعي محاميه مجالات القانون واسعه
واي استفسار ما جاوب عليه عيسى اكيد بنكون جاهزين بالاجابه عنه وعن قريب رح انزل الخطة الدراسيه مع شرح بسيط عن كل ماده من مواد التخصص

يوسف مومني - فريق عمل طلاب كلية الحقوق

مروه
07-09-2009, 12:28 AM
شكر لألك أخ يوسف ... وان شاء الله ازا احتجت شي رح الجألكن ... بتمنالك التوفيق

صفاء الايمان
07-09-2009, 07:54 AM
هلا فيكي مروة منوووووووورة
بالتوفيق ^_^

محمد سليمان الخوالده
07-20-2009, 12:57 PM
اهلا بك في هذا المنتدى
اشجعك على دراسة الحقوق
للعلم انا درست الحقوق عن رغبه..........معدلي بالتوجيهي فوق 85% علمي
وانهيت البكالوريس الحقوق (امتياز) والان ماستر...ابنتي العزيزه..
الطب......تكون حياة الشخص بين يدي الطبيب
الحقوق.......تكون حرية السخص وحقوقه بين يدي المحامي........رايي انهما اقضل تخصصين
وبالتوفيق..ابنتي