ما هو الفرق بين المجنون والمعتوه والسفيه والمغفل ؟!
هذا الموضوع لي وقد كتبته في احد المواقع الشبابيه لاجل استزاده المعرفه فعذارا على الصياغه غير القانونيه :):D
يمكن بالعاده واحنا بنمزح مع بعضنا بنطلق هاي الالفاظ على بعضنا واحنا ما بنعرف معانيها ولا على ايش بتدل .. حتى لو واحد سألنا يمكن كثير منا رح يتلبك ويحكي تقريبا كلهم نفس الاشي ..
طبعا الثقافه القانونيه مطلوبه للجميع وهذا الموضوع رح ادمج فيه الثقافه العاديه مع الثقافه القانونيه ...
علشان بس تقرأه تصير عارف تماما ما هي ابعاد كل لفظ من الالفاظ التاليه ....
ببساطه ...
المجنون : شخص لا يميز بين الخير والشر وهو خطير على المجتمع وهو ينقسم الى نوعين
- مجنون مُـطْبق ( اي انه مصاب بهذه العله منذ ولادته الى الآن )
- مجنون غير مُـطْبق ( اي ان الجنون لديه وجد حديثا او انه يتناوب اي ياتي ويذهب )
المعتوه : شخص لا يميز بين الخير والشر الا انه لا يشكل خطرا على المجتمع
المغفل : كل من يسهل خداعه ( قواه العقليه تامه يعني الا انه سهل الانقياد والخداع )
السفيه : كل من يبذر امواله ويسرفها فيما فيه خير وفيما ليس فيه خير
طبعا الواحد منا ممكن يسأل شو الفائده او شو الحكمه من معرفه هذا .. اذا انه للثقافه وبس فاوكي هينا قرأناه روح عمو قرفتنا
بس اذا في اشي ثاني هاته اكلت راسنا ترى
بس انا بعطيها بوز زي هيك
وبصفن شوي وبلغه الواثق
بقله :
نعم فيه فائده وفائده عظيمه هي :
انه مستقبلا لما تصير بالغ راشد عاقل
ومكتمل الاهليه ان شاء الله وتمشي بحياتك العاديه اليوميه رح تشوف انه هاي المعاني ممكن تشكل حاجز امامك عندما تريد اتمام عمليه ما او عند التوقيع على عقد ما ...
طيب يا شاطر شو معنى اهليه ؟
شو يعني مكتمل اهليه ؟
شو رح تفرق معي انا ما خلص بس اوقع العقد انتهت الامور ؟
الاهليه : احد شروط اتمام اي عقد وهي توزع على ثلاث مراحل
1- فاقد الاهليه ( عديم الاهليه ) : الطفل الذي لم يبلغ سن التمييز بعد (7 سنوات )
- كل العقود التي يبرمها باطله تماما ولا يؤخذ بها
2- ناقص الاهليه : الطفل المميز دون سن الرشد ( الطفل بين 7 - 18 سنه )
العقود التي يبرمها تخضع لثلاث حالات :
- اذا كانت نافعه له ( يعني المصاري الي معاه ما رح ينقصوا بالمره ) فالعقد جائز .
- اذا كانت ضاره له ( يعني المصاري الي معاه رح ينقصوا ) فالعقد غير جائز وباطل .
- اذا كانت دائره بين النفع والضرر ( يعني مصاريه لا رح يقلوا ولا رح يزيدوا .. مثال عليه عمليه المبادله ) فالعقد بيكون موقوف ( اي ان العقد لن يصبح جائزا الا بموافقه ولي الامر او وصول الطفل دون سن 18 الى سن ال 18 وموافقته على هذا العقد ليصبح جائزا ) .
3- مكتمل الاهليه : وهو كل من وصل سن 18
- فكل العقود التي يبرمها صحيحه وجائزه طبعا ضمن القانون
طيب انا مش فاهم انت خربطت الدنيا .. شو دخلنا بالاهليه انت قلت بدك تشرح لنا عن المجنون والمعتوه والشله تبعتهم .. رحت نطيت للاهليه ليش
...
لازم تخليني اعصب يعني
..
اصبر يا زلمه هلأ بتعرف
..
افرض انك بكرى وانت ماشي بالشارع شفت لك واحد معاه مصاري كثير وماشي بالشارع يزت يمين وشمال فرحت انت وقلت له تعال وقع لي هون اغلبك ... وتروح وانك كاتب جوه الورقه انه انا الموقع ادناه اتنازل عن كل املاكي المنقوله وغير المنقوله لصالح XXXXXXX .
ورحت على الدار ومكيف على حالك وبتحكي ضحكت عليه وصار مع مصاري ليوم المصاري مصاري مثل الرز ( رز بسمتي ابو حبه طويله تبع الكبسه )
<<< هذا جوعان
وانه بكرى بدك تنزل على المحكمه حتى تحصل على كل اشي اخذته من هالاهبل
...
ببشرك انه هذا لن يتم ..
لانه الاموال غير المنقوله ( الي ما بتقدر تنقلها من مكان لاخر مثل البيت ) لا يمكن التنازل عنها بورقه انما تحتاج التسجيل في الدائره المختصه ( السجل العقاري ) .
ايضا هذا الي بيوزع مصاريه يمين وشمال اكيد مو طبيعي واكيد اله اهل بيخافوا عليه وبحبوه
واكيد ما رح يسمحوا لواحد زيك يضحك عليه
هنا بنبلش بتعقيد القانون ومراحله وحتى ما نفوت بهذا التعقيد .
رح نبين ليش العقد مو جائز ....
كنا نحكي قبل شوي عن الاهليه .. وبينا انواعها
1- فاقد الاهليه ( عديم الاهليه )
2- ناقص الاهليه
3 مكتمل الاهليه
هلأ المجنون والمعتوه بيكونوا بالخانه الاوله ( عديمي الاهليه )
وبالتالي جميع العقود الي بيبرموها باطله ...
ايضا السفيه والمغفل بيكونوا بالخانه الثانيه ( ناقصي الاهليه )
بالتالي العقود الي بيبرموها بتكون موقوفه ( يعني تحتاج موافقه ولي الامر او الوصي )
وهيك احلامك كلها تدمرت
والمصاري الي زي رز بسمتي ابو حبه طويله تبع الكبسه تبخروا
وفوق هذا كله ممكن اهل البني ادم الي حاولت تضحك عليه يرفعوا عليك قضيه احتيال وتقضي بقيه عمرك بالسجن
فمن يوم وطالع اذا واحد سب عليك هيك مسبه اتفلسف عليه كويس وانكش مخاتك عليه حتى يفقد اهليته ( يعني ينجن )
وتوته توته خلصت الحتوته
حلوه ولا فتفوته
المفضلات