إعترافات ساذجة

[أحمد أبو زنط]

إعترافات ساذجة

نحبس أنفاسنا... نكتمها ... ونعض على لساننا خشية أن ينطق بما يعترينا..

تأسرنا الكلمات .. تكبلنا .. تحصرنا في جحر ضيق .. وتحشرنا بين المطرقة والسندان


هفوات .. نرتكبها صغارا .. نهرب بها بعيدا.. نقبرها في فناء منزلنا ونطمرها بالتراب... بعد عشرة.. عشرين .. ثلاثين .. عاما.. يحررنا السر الدفين .. ولا يعود له تلك الاهمية .. نكتشف فجأة أن ما أخفيناه كان مجرد وهم .. وهمٌ أودعناه للتراب ... وهمٌ أخفيناه عن أعيننا !!

في هذا الموضوع سوف يعترف الاعضاء بكل مشاكساتهم التي إقترفوها في حياتهم

نعانق الصراحة .. نبوح بأوهامنا السخيفة .. نزيل الرمال عن بقايا ماض يرهقنا .. ماض زال من كل مكان ... ولم يزل من جدران الذاكرة


على الجميع أن يقدم إعترافه ويصرح بما يكتمه عن الاخرين .. أسرارنا القديمة ستكون اليوم مصدر سعادتنا ... ننشرها على صفيح ساخن لنكتشف مدى سذاجتها ..

المواضيع المتشابهه:

• إعترافات ساذجة

[Essa Amawi]

أسرارنا القديمة ستكون اليوم مصدر سعادتنا ...

مش عارف
يا رب

[أحمد أبو زنط]

طيب يلا إعترف شو مخبي من إنت وصغير !!!!!

[Essa Amawi]

اسال حسون
<< بس لا تنصدم كثير

[أحمد أبو زنط]

ما بدي أسأل حدا .. يلي بدك إياه إحكي وإلي بدك تخبيه خبيه

[Essa Amawi]

هذا وانا صغير كنت احب امشي على حفة الرصيف وانا بحكي ببالي هلأ بشوفني تبع السيرك وبيخليني اشتغل معاه
ههههههههههههههههههههههه

[أحمد أبو زنط]

هههههههههههههههههههههههههههه

طيب إذا هيك بسيطة

=======================

انا راح أعترف بشغله .. لما كنت صغير بالصف الرابع سرقت عصاية المس غادة مسة الانجليزي لأنها كانت تضربنا 10 عصي كل ما غلطنا .. وخبيتها بالشنته طول الدوام .. طبعا كانت طويلة كتير وإضطريت اكسرها نصين حتى تدخل بالشنته ولما روحت على البيت طلعت ورا البيت وحرقتها .. هلا لما رجعت على البيت أمي شمت ريحتي حريقة وفكرتني بدخن وتحلفت غير تضربني بالبربيش.. انا حكيت علي وعلى أعدائي والجريمة مشيت بدمي .. فرحت سرقت بربيش الغسالة وهربت .. وكمان مرة حرقته .. وهيك حسيت حالي خلصت من كل أدوات العقاب التي كانت تمارس ضدي ..

بس للأسف طلع كل هالحكي على الفاضي .. رجعت على البيت وأكلت قتله بالقشاط .. وتاني يوم بالمدرسة المس غادة جابت عصاية أكبر وأخمل .. وحكتنا كل عصاية بتسرقوها راح أجيب أكبر منها .. واخيرا إكتشفت إنو الجريمة لا تفيد .. ولا بد من اللجوء للحل الدبلوماسي والمباحثات الثنائية .. وكان لا بد من دعوة أمي للعودة إلى طاولة المفاوضات لوووووووووووووووووووول

هلا من كل هالحكي أنا مش عارف ليش حرقت العصاية .. يعني كان رميتها وخلص ,, أنداري .. سوسة الانتقام شاطرة -_-

[Essa Amawi]

هههههههههههههههه
جد الجريمه بدمك

[صفاء الايمان]

ههههههههههههههههه
عليكم قصص
طيب انا بقللكم
بس مش فاكرة اشي مهم كتير
كنت مشاكسة يعني اجمالا لساني طويل برامة بتالف قصص ومن صغري
كنت كل ما اشوف حد احكيله بدي احكيلك قصة حياتي
يعني عشت الدلال 5 سنين لاجى ابراهيم ما بنكر انو بس اجا ابراهيم بالاول انبسطت عليه بس لانو بيبي بس شفتو اخد الدلال كنت احاول انتقم او اعمل مشاكسات بالبيت وكتييييييييييير كنت اتخبى ورا الفرشات او بالبلكون وماما دايما بتبكي ما بعرف شو قصدك باعترافات لكن حياتنا تجارب ومش كلها بنتذكرها لكن بنتذكر لعبر فيها
شكرا للفكرة الحلوة
عفكرة انك تحرق البربيش كمان -_________- اما عليك
بس في موققف ما بروح من بالي وانا بصف 3 كان لازم يعطوني شهادة تقدير لانو بحق كنت ادرس وشادة حيلي كتير بس لوجود بنت لمديرة بصفي ووجود منافسة لالي وما في غير شهادتين المس اعطت بنت المديرة ع انها الاولى وانا يلي بتنافسني ضبت الشهادة بالخزانة عشان ما نزعل -_- ومن وقتها حقدت ع التعليم ومعلماتو
عكل هيي تجربة
اشيا كتيرة ابو زنط مريت فيها مش فاكرة اشي

[صفاء الايمان]

بعترف وانا عمري 5 سنين خلطت الكولا مع الشاي والسكر والملح وشربتهم << مشروب سحري وقتها مش عارفة كيف شربته -__________- وسميته شراب صفاء المنعش ههههههههههههههههههههههههههههههههه
بذكر وانا عمري 7 سنين كنت بسوق بابراهيم بالبسكليت وانا وراه بدع فيه الا شفت زلمة رحت تركت ابراهيم بنص الشارع وهربت جوا البيت
ذكر اني كنت بس اروح من الروضة الم حجار من الحارة وبضل واقفة باب البيت لتروح ماما من الشغل هيي وبابا عشان اذا اجا حرامي اضربه
ههههههههههه لسا في كمان لاتذكر

[أحمد أبو زنط]

هههههههههههههههه

طيب أنا عندي إعتراف .. انا وبالصف التاسع أخدت الشهادة النهائية وكنت مخبص ... المهم بعد ما أخدت الشهادة رحت على المكتبه وصورتها

أخدت الصورة وفي مكان العلامات والاسم وكل شي مكتوب بحبر ..حطيت طامس .. حتى رجعت ورقة فاضية .. ورحت صورتها كمان صورة وهي مطموسة .. طلع عندي هلا ورقة جديدة مش مستعلمة

بلشت احط العلامات على كيفي بقلم سائل .. على شان الحرفية بالتزوير يعني .. وخربشتلي خربوشة مكان التوقيع تبع مربي الصف والمدير وبالملاحظات صرت أمدح بحالي .. المهم أخدت الورقة وبوجهي على البيت وقلتلهم هي الشهادة .. ويومها بتذكر أخدت مكافئة كمان .. هههههههههههههههه فعلا طلعت مجرم -_-

[صفاء الايمان]

يما يما بتخوف انت
طيب بذكر اول مرة بحياتي وهيي الوحيدة غشيت وانا بصف عاشر كان بحصة التاريخ والجغرافيا امتحان يومي عادي
المهم كويز الاستاذ عامل نموذجين من الاسئلة ووقتها اجانا مشرف المهعم كنت اكتب بالقلم الحبر ووطول الامتحان البنت يلي جنبي بتدق فيي بتحكي عندك صح وخطا الاولى حاطيتها صح وهيي غلط
المهم انتهت باخر ثانية من الامتحان رحت مسكت قلم رصاص واعملت الصح غلط وهوو اصلا مكتوب بلحبر فشوف الغبا يعني المهم انتبه الاستاذ والمصيبة انو صاحب بابا بدرس معو بالجامعة -_- شوف الاحراج وقتها عيطت لقلت بس ههههههههه المهم رحت تاسفتله وعاد الامتحان وجبت 9.5 /10 ههههههههه

[Essa Amawi]

انا وبالصف التاسع أخدت الشهادة النهائية وكنت مخبص ... المهم بعد ما أخدت الشهادة رحت على المكتبه وصورتها

أخدت الصورة وفي مكان العلامات والاسم وكل شي مكتوب بحبر ..حطيت طامس .. حتى رجعت ورقة فاضية .. ورحت صورتها كمان صورة وهي مطموسة .. طلع عندي هلا ورقة جديدة مش مستعلمة

ههههههههههه

هذا بالاول ثانوي
الشباب كلها كانت مخبصه
وما الاقيهم الا جايين عندي
قال بدنا طريقه نزبط فيها الشهاده
قلت لهم عن طريقتك
قالوا لي بطلت تمر على اهلينا

ظليت افكر
بالاخير قلت لهم الي بده شهادة موقعه ومختومه بختم المدير وتوقيعه بيدفع كم
وعلى اساس انه 3 دنانير على الشهاده

روحت لك على البيت
وخذلك على تصميم
تصميم
تصميم
وسحبت الختم على السكنار ومعاه التوقيع
وخذلك على ترقيع وتبيض للورقه
<< لانه كانت الورقه الي عليها ختم شبه سوداء من سوء جوده الطابعة
المهم والله واطلع لك شهاده نفس الاصليه

هههههههههههه
وصلتها للصف
والكل صار بده يشتري
قلت لهم اسمعوا علي
انا بشاركش بجرائم اروح فيها مؤبد
ومسكت الورقه ومزعتها
وحطمت امالهم

[صفاء الايمان]

يا شرير -_- وانت شو زبطت تاعتك ؟

[أحمد أبو زنط]

ههههههههههههههههه

ما أنذلك !!!

========================

اسمعوا يا جماعة الخير .. انا بهذا الموضوع راح تكتشفوا عني أمور حفرتلية !! .. يعني أنا وصغير كنت شاق الارض وطالع .. فصلوا على النبي .. ولا تاخدوا عني فكرة غلط هههههههههههههه


======================

خلينا نبلش بهذا الاعتراف::

انا وصغير ما كنت بحب رأح على صلاة الجمعة .. كنت ازهق واما أفهم شو بيحكي الامام .. غير إنو رجلي كانت تتكسر من القعدة .. بلا طول سيرة .. لما كانت تيجي صلاة الجمعة اطلع من البيت على اساس إني طالع رايح على الجامع .. وأقضيلكم إياه تقصوع بالشوارع حولين المسجد .. بس يا ريت الامور إجت على هيك !!

كنت ألف على كل السيارات إلي صافة للصلاة وأفتح غطي البنزين - كانوا زمان يفتحوا من برة - وهيك حتى تصير كل السيارات فاتحة الغطي .. وشوفوا منظر الناس وهي طالعة من المسجد كلها تتفرج على سياراتها ويقعدوا يسكروا الغطي وهمه ببرموا عن هالولدنة !! يعني لو إنهم مش طالعين من الجامع كان طرطقولي بالمشرمحي

[صفاء الايمان]

هههههههههههههههه
اللهم صلي ع النبي
وشو كمان هاتو لشوف

[صفاء الايمان]

ابو زنط اخوي اهدى منك كان يروح ينام بالجامع ليجي الصلاة يروح يتوضا بالمتوضا ويرجع يصلي ههههه

[Essa Amawi]

ههههههههههههههههه

عنا اشرار ما شاء الله

==================

هذا مره عملت لك حركه حقيره

كنت رايح اشتري اغراض للبيت
ومع دينار

المهم الدينار وانا مارق من عند الملعب ضاعت

كيف بدي الاقيها
كيف كيف ؟؟

رحت رسمت لك خريطه ابصر كيف على الارض
وناديت ولاد الحاره على اساس اني لقيت خريطه كنز ..

وانه رح نلاقي مصاري

اتفقت معاهم انه الي بلاقي المصاري بتقاسمه انا وهم
لانه انا لقيت الخريطه

المهم بعد 3 ساعات من التدوير على الدينار تبعتي

اكتشفت اني حاطها بجيبه البنطلوب من ورى

وقلت لهم انا زهقت والضحكة الحقيره تشع من عيناي
الاحقر من هيك
انه الولاد ظلوا يدورا لاخر الليل وكل واحد رجع واكل قتله من ابوه لانه موسخ حاله

ههههههههههههههههههههه

[أحمد أبو زنط]

هههههههههههههههه

الله لا يوطرزلك على هالعملة ... مساكين الولاد !!

[Essa Amawi]

هههههههههههه

اما انت ؟

-_--

[أحمد أبو زنط]

ههههههه أنا بريء

------------------------------

على قصة بريء وما بريء تذكرت هالقصة

هذا مرة في بيتنا القديم كان في ابن جيرانا أسمراني كتير وكان ما شاء الله مليان كتير .. المهم انا كنت ولد مسلوع قد النتفة .. وكنت مصاحب بنت الجيران وكانت قدي .. هلا نحنا الثلاثة كنا بنفس العمر .. ويمكن كان عمرنا 5 - 6 سنين

المهم كنت دايما أنا وبنت الجيران نعمل فخ لهذا الولد .. ونستدرجه على تسوية البيت إلي نحنا ساكنين في .. وبس نصل تحت كنا نربطه على الشمعة (العمود) ونسحل بنطلونه ونهرب ... هلا المشكلة مش هون .. مرة نورا الخدامة إجت طرطقتنا وما خلت وإحنا مش فاهمين إشي كانت تبرطم بالسرلنكي وقعدت تفكفك المصخم من الحبال .. واخدت الولد وراحت وهي بتصيح .. طبعا شو على رجعة أبوي من المجلس !! ويا حبيبي على هيك وقعة

سحبت حالي وركاض على البيت ودخلت الحمام وعلى أساس إني كنت اتحمم عبيت حالي مي على السريع ولفيت حالي بالمنشفة .. وطلعت من الحمام على فتحة أبوي لباب الدار وهو بصيح وبدور علي ... ولا إجت امي من المطيخ متصربعة بتقله شو مالك ؟؟؟

ولا بحكيلها المحروس ابنك مربط ابن ام شحادة ومسحول وبنطلونه .. طبعا هون انا مريت قدامهم ومنظري زي يلي صرلو ساعة بتحمم.. وقلتلهم بغبا .. شو في ؟؟

أبوي بقلي إنت وين كاين .. قلتله كنت أتحمم .. !! صرلي ساعة بالحمام !!

ولا صار يحكي ولا لويش ملعونة الوالدين بدها تلزق التهمة بالولد !!!

الولد قاعد في البيت بتحمم خلته صار مربط الولد .. يخرب بيتها ما اكذبها !!

وهيك مرت الشغلة !!! وطلعت انا بريء

[Essa Amawi]

هههههههههههههههههههههههههههههههههههههههههههههههههه

هههههههههههههههههههههههههههههههههههههههههههههههه

ولك والله انك شرير

<< وبيقولوا ليش المحامين بيعرفوا يطلعوا الشعره من العجين
هههههههههههههههههههههههههههههههههههههههههههههههههه

[Essa Amawi]

هذا مره واحنا صغار
يمكن 10 سنيين او هيك اشي

المهم بدنا نطلع (ولاد الحاره) يمكن كنا 7 او8
من بيتنا للسوق
<< حوالي 2 او 3 كيلوا

المهم في باصات بتلف حول الاسكان وبتوصل للسوق
احنا بدنا نطلع فيها ..
اجره الباص كانت ايامها 5 قروش
هسع 20 قرش -__-

وعلى ايامها كان في باصات كبار اسمهم باصات المؤسسه وكانت تسميتهم الدارجه ( جحش الدوله )

هذا الباص بس تركب فيه لازم تدفع قبل ما تقعد

طلعت انا وقلت هي الحساب مع الي وراي
طلع الي بعدي وقله مع الي وراي
الي بعده يحكي مع الي وراي
وهيك طلعنا احنا كلنا لحد ما وصل لاخر ولد فينا ..
صار يقله حي الحساب مع بابا ورانا

هههههههههههههههه
ويطلع لك الزلمه
وعينك ما تشوف الضو الا وهو كله علامات تعجب

صاحب الباص بيقله ما شاء الله ولادك مؤدبين

صفن الزلمه بيقله شو بعرفك فيهم ؟

بيقله هيهم قاعدين ورى هسا طلعوا

قله معيش حدى

وما لف وجهه علينا
الا كنا كلياتنا نزلنا من باب الخروج
هههههههههههههههههههههه

ووالله العليم
كانه انسب علينا

هههههههههههههههه

[أحمد أبو زنط]

ههههههههههههههه

ما هو المصيبة إنو 8 ولاد لأب واحد وبنفس العمر كمان !!!! هههههههههههه مصيبة

وبتحكي عني شرير !!


يا جماعة زي ما قلتلكم .. هذا الموضوع يلي بتقرأه فيه بتنساه .. طلعنا أهمل خلق الله ... -_-

نفسي أبو السعيد يجي يعترف ... شكلو مفظع بزماناته ...

[Essa Amawi]

انداري شكله خلصت الاعترافات

انا عندي كثير
بس ناسي صراحه -_-