بدنا شدة حيل ،،، صفاء الايمان على كرسي الاعتراف

[أحمد أبو زنط]

صفاء .. بكلمة .. هذه الكلمات ماذا تعني لكي ؟؟

القراءة
الحب
النقد
السياسة
فلسطين
الاردن
lawjo

[صفاء الايمان]

صفاء .. بكلمة .. هذه الكلمات ماذا تعني لكي ؟؟

بحاول

القراءة

وسيلة اما للمعرفة واما لتفريغ الطاقة وتحسين اسلوب واما اخذ فكرة واما تغيير واقع

الحب

اروع وارقى مما بنوصف بكلمة عبرو عنو شعراء كتار وكتاب كتار بس ولا حد اعطاه حقه الا يلي عااشه بصدق بكل جوارحه وقلبه ومعطيه هدف لالو " قصدت الحب بين شب وبنت وهوو بالشرع الزواج " اما الحب يلي بالعيلة وبين بنت وبنت وحب الصحبة وهيك فهاد برضو علاقات ولا اسمى واروع منها بس حب لتبني بيت اهم وارقى لانو اذا اتاسس البيت اصلا ع الحب معناتو تفاهم واسرة متفاهمة برايي

النقد

ناس امتهنوه وناس كان الهم وسيلة للاستفزاز وناس الهم اسلوب حياة وتوصيل افكار عند البعض

السياسة

انداري .. باب بفتح ابواب .. وهاي الابواب اما في السماء او في الارض

فلسطين

المكان يلي كنت ولا بحياتي افكر ولو مجرد تفكير اني حعيش فيه كان مجرد خيال وهالواقع غير حياتي اظن كانت نقطة مفاجئة بحياتي " عفكرة واحنا جايين ع فلسطين ع اساس نستقر وخلاص ندرس هون وكل شي كنت ادعي يكون الجسر مسكّر لانو طلعنا بيوم كان نص دوام الجسر وع الظهر لوصلنا اظنها بل هيي حكمة ربانية ووجود اقدار لنا في هذا المكان "

الاردن

ياااااااااااا اردن .. ممممم طفولتي واول ايام طلعت ع الدنيا ناس كتار وحياة واحلام ما كنت متوقعة اترك هالبلد بيوم

lawjo

مكان في ناس راقيين تعلمت منهم اسلوب وافكار ومبادئ غيرت نظرتي للحققوق كتخصص برضو ومهنة مستقبل

تفضلو اذا في كمان

[Essa Amawi]

مرحبا ^^

1- قالت العرب :
الولد سر ابيه

فهل البنت سر امها ؟


2- هل صفاء تضحي عادة لاجل اقناع نفسها بانها افضل ؟

3- ما نظره صفاء للماضي والحاضر والمستقبل ؟


4- هل كان يوما لقراراتك اثر سلبي في حياتك ؟ كيف ؟

5- ماذا توحي كل من الكلمات التاليه لصفاء ؟
- صوره حزينه :
- دموع :
- الصوره التي في توقيعك :
- النهاية :
- بداية جديده :
- تجارب :
- حياة :

[صفاء الايمان]

مرحبا ^^

^____^ اهلا

1- قالت العرب :
الولد سر ابيه

فهل البنت سر امها ؟

يمكن

2- هل صفاء تضحي عادة لاجل اقناع نفسها بانها افضل ؟

بحاول ع الاقل لابعد عن اي طاقة سلبية

3- ما نظره صفاء للماضي والحاضر والمستقبل ؟

ماضي الم
حاضر تطور وامل وايجاااااااااااابية وراحة وطمانينة
مستقبل الحياة والانجاز والنجاح

4- هل كان يوما لقراراتك اثر سلبي في حياتك ؟ كيف ؟

مممممممم اظن اني اهتميت بغير الدراسة بالتوجيهي كان لاله اثر كبير

5- ماذا توحي كل من الكلمات التاليه لصفاء ؟
- صوره حزينه :

بطلعش عليها بطلع وراها

- دموع :

ربما قوة وربما انتقام وربما ندم

- الصوره التي في توقيعك :

المستقبل هاي هيي جنى

- النهاية :

بداية طريق جديدة حتما

- بداية جديده :

الامل

- تجارب :

الماضي

- حياة :

طرق كلها كل واحد بتخير يلي بناسبه


تفضلو يلي بدو

[Mohammed Hawamedh]

ماشاء الله ما شاء الله ما قصروا الشباب الطيبة و الله
غير ت ********** لاني نزلت الموضوع هههههههههه
مشكورة على اجاباتك الصريحة صفاء

[أحمد أبو زنط]

هل هنالك شيء في ماضي صفاء يسبب لها بعض المتاعب ؟؟

وهل ماضيك يختلف عن حاضرك؟

وهل مستقبلك يعكس حاضرك اليوم ؟

[صفاء الايمان]

ماشاء الله ما شاء الله ما قصروا الشباب الطيبة و الله
غير ت ********** لاني نزلت الموضوع هههههههههه
مشكورة على اجاباتك الصريحة صفاء

اهلين تفضل اذا عندك اسئلة

[صفاء الايمان]

هل هنالك شيء في ماضي صفاء يسبب لها بعض المتاعب ؟؟

ممممممم معدل التوجيهي شو بكره الظروف يلي عشتها وحكمتني واثرت على دراستي شو بكره هديك الايام لو بايدي امحيها واحذفها بس وين ما تروح بالجامعة بسالوك معدل التوجيهي لتاخد دورات نفس الشي جد اشي بيوجع من جواي يا عالم يا هوووووووووووو انا مش هيك ولا مستحيل يقتنعو كانو المعدل مقياس
ومرات الذكريات والاحلام "بالنوم بس تيجي بلذكريات" بتشحن ببعض الطاقة السلبية

وهل ماضيك يختلف عن حاضرك؟

اكيد شتااااااااااان شتااااااااااااان
مخصوص بالنظرة للدنيا والافكار والاهداف كليا تغيرات

وهل مستقبلك يعكس حاضرك اليوم ؟

سؤال ممممم مهم
ليس على العموم ولكنني اريد الافضل

اي شي تاني تفضلو ^^

[Essa Amawi]

1- شو احب ايام الاسبوع الك ؟ ليش ؟

2- اسمعنا نازله تحكي انك طباخه ، متى عازمتيا ؟ على شو ؟

3- يوم الخميس شو بيمثل لك ؟ هل هو يوم راحه مثل بقيه الناس ؟

4- هل ترهقين نفسك بالعمل عاده ؟ لماذا؟

5- اعمال المنزل عرفنا ان صفاء تقوم بها دوما ؟ هل تقومين باعمال اخرى ؟

[صفاء الايمان]

1- شو احب ايام الاسبوع الك ؟ ليش ؟

اي يوم للدوام مخصوص السبت
بس بكره الجمعة المهم لانو كل الشغل فيه

2- اسمعنا نازله تحكي انك طباخه ، متى عازمتيا ؟ على شو ؟

اه الخبر الاول صح بس الثاني اشاعة

3- يوم الخميس شو بيمثل لك ؟ هل هو يوم راحه مثل بقيه الناس ؟

يا ويلي من هاليوم ذكرتني اني بكرهه
ممممم عندي بهاليوم لازم اخلص شغلي بدري مخصوص لانو اخواني بروحو بدري والطبيخ يكون جاهز بس يجو يعني ازمة

4- هل ترهقين نفسك بالعمل عاده ؟ لماذا؟

مممممم بما ارضى اني قمت بالواجب
ما بحب اسوي اشي مش متقن بقدر ما اقدر بحاول اعطي كل شي حقه
شغل البيت راحه لالي بس اكره اشي عندي حد يقومني ويطلب مني اشي بوقت راحتي يمكن اعصب

5- اعمال المنزل عرفنا ان صفاء تقوم بها دوما ؟ هل تقومين باعمال اخرى ؟

شغل البيت طبيخ جلي غسيل شطف كل شي بس ايش اشيا الاخرى بتقصد ما فهمت ؟

[أحمد أبو زنط]

مممممممم طيب

سر لم تبح به صفاء لأحد قبل اليوم !!

[Essa Amawi]

1- اسمعنا انه صفاء باقيه عياطه وهي صغيره ، ليش باقيه مطيره النوم من عيون امك ؟

2- علاقه صفاء بعائلتها كيف ؟

3- هل صفاء تحب النظام العائلي ؟ لماذا ؟

4- العائلة الممتده حسنة ونقمه .. فهل جربت العيش في مثل هذه العائله ؟ ما رأيك ؟

5- لنفترض انك قائده العائله والقائمه عليها .. ما هي ابرز الامور الجديه التي ستقومين بها ؟

[YoUSeF MoMaNI]

بيقولوا الاغبياء نوعين

ناس تفكر ولا تعمل وناس تعمل ولا تفكر

شو رأيك ؟

[صفاء الايمان]

مممممممم طيب

سر لم تبح به صفاء لأحد قبل اليوم !!

اذا بحكيه ببطل سر
اظنه شخصي للغاية ممممممم المستقبل بيكشف كل شي الله اعلم

[صفاء الايمان]

1- اسمعنا انه صفاء باقيه عياطه وهي صغيره ، ليش باقيه مطيره النوم من عيون امك ؟

لانو كنت دلوعة مو متل اخواني واخواتي ورا بعض ودلعت 5 سنين بعدها اجا ابراهيم غيرهيك انا اصغر بنت والكل كان يحبي

2- علاقه صفاء بعائلتها كيف ؟

كصفاء بحس حالي حموت اذا ابعدت عنهم بحبهم بعشقهم كل كلمة حب في الدنيا لالهم تعلمت منهم وربوني
كصفاء اخواني مرات بعاملهم زي اولادي يعني بالاهتمام واقرب لالي من اي شي
بحب اعطيهم كل يلي معي انا وكلي افديهم

3- هل صفاء تحب النظام العائلي ؟ لماذا ؟

مممممم الشغلة مزاجية
وبحسب العيلة مثلا احنا ودار خوالي وكمان واحنا واهلنا بالاردن خالاتي وهيك كنا اكتر من عيلة يعني بالمفهوم والعدد متل كانو كلنا من بيت واحد مافي تمييز
كان شي رائع واحساس بالهمة اكتر وتنافس مرات
صدقا شي حلو بس كنظام اهل دار عمامي بحس بثقل ظل منهم يعني ع الطالعة والنازلة يسالو وين وكيف وليش ثقيلة مخصوص ع البنت

4- العائلة الممتده حسنة ونقمه .. فهل جربت العيش في مثل هذه العائله ؟ ما رأيك ؟

مممممممم بالزبط
انو تعيش مع ستك وكبار بالسن بخليك مرات تنجن ومرات تنبسط
مممممممم برايي انو لكل جيل اهتمامات

5- لنفترض انك قائده العائله والقائمه عليها .. ما هي ابرز الامور الجديه التي ستقومين بها ؟

اول شي بحاول لعيلتي اني اشوف شو الاشيا يلي بتهمهم كل واحد وشخصيتو
بهمني انو يكونو مرتاحين نفسيا
بحاول اذا بقدر اعينهم ماليا وماديا
بوفرلهم بقدر استطاعتي ومقدرتي
اذا عندي اطفال بهتم فيهم وبحاول اعطيهم الحنان ولاللتميز او التفريق او اي شي بيناتهم
بهتم فيهم متل ماماما وبابا بهتمو فيي واكتر

[صفاء الايمان]

بيقولوا الاغبياء نوعين

ناس تفكر ولا تعمل وناس تعمل ولا تفكر

شو رأيك ؟

التفكير والعمل اذا تلازمو بحققو انجاز وتحقيق اهداف
هوومش غباء بمعنى الغباء بس مرات ظروف بتحكم البني ادمي وبتحجزه ليكون هالعنصرين التفكير والعمل مع بعض
كصفاء ع هيك بعتبر اكبر غبية لانو كتير كنت ارسم اهداف بس لسا ما تخليت عنها واهتماماتب الظروف بعدت عني هالانجاز والعمل يمكن القدر اجلو ومش وقته هسا
اما اني اعمل بلا تفكير هاي كانت حالات طارئة وتلقائي عفوي بس برضو تعلمت منها وكانت تجارب فشل او نجاح بحياتي
بظن هالمقولة بتحكمها لوازم
انو اذا كانت كل الظروف مهيئة وانت متوفرلك كل شي حتى مع هيك لا يعتبر غباء وانما تقدير الهي لتفووت بمرحلة او تتعلم شي
ما بعرف شو تعريف الغباء عند الناس والفلاسفة بس بفلسفتي انو البلاهة والبلادة

[Essa Amawi]

جمعة مباركه حجه ^^


1- الموت ، ماذا تمثل هذه الكلمه لصفاء ؟

2- هل حضرت قبل ذلك جنازة احدهم منذ بدايتها ؟ ( ما قبل مراحل الدفن اقصد )

3- كيف كان شعورك اذا كانت الاجابه نعم ؟

4- هل كان لموت احدهم اثر في نفس صفاء ؟

5- احيانا نتمنى كبشر في بعض ساعات الغضب او الضعف او الحزن ان تنتهي حياتنا ونموت ... فهل جربت هذا الشعور ؟ متى ؟ كيف ؟

[صفاء الايمان]

جمعة مباركه حجه ^^

علينا وعليكم

1- الموت ، ماذا تمثل هذه الكلمه لصفاء ؟

بتخوف .. لكنها تحفيز بنفس الوقت

2- هل حضرت قبل ذلك جنازة احدهم منذ بدايتها ؟ ( ما قبل مراحل الدفن اقصد )

3- كيف كان شعورك اذا كانت الاجابه نعم ؟

لا

4- هل كان لموت احدهم اثر في نفس صفاء ؟

اشخاص قابلتهم بس اسمع نعي موتهم او خبر موتهم بتتحرك الذكريات وايام يلي التقيت فيها معهم لاتفه موقف

5- احيانا نتمنى كبشر في بعض ساعات الغضب او الضعف او الحزن ان تنتهي حياتنا ونموت ... فهل جربت هذا الشعور ؟ متى ؟ كيف ؟

اها مرات منهم
اولى في لحظة عاطفية
الثانية وقت نتائج التوجيهي لانو كانت حالتي النفسية بالمرة اضافة للذنب يلي حسيت فيه لانو ما كانت مرضية لاهلي
ومرات بلحظات غضب وتحمل مسؤولية لا اطيقها او مواقف غضب

[Essa Amawi]

^__^

1- يبدوا انك تتكلمين عن الماضي وكانه حجر عثره ، هل يعيق هذا الحجر خطى المستقبل ؟

2- ما تزالين في اولى مراحل شبابك .. فما هو الماضي الذي تتحدثين عنه ؟ الى اي عهد يعود ؟

3- يقال بان مستقبلنا يعتمد على ماضينا .. على هذه العباره صحيحه برأيك ؟

4- الانسان عدو ما يجهل .. فكيف تتصرف صفاء مع ما تجهل ؟

5- لكل منا تجاربه التي تثري صفحات حياته .. بعضنا يأخذ العبر من تلك الصفحات ويمزقها الى الابد ، بعضنا ياخذ العبر من تلك الصفحات ويبقييها شاهدا على انه انتصر ، البعض الاخر يبقي الصفحات ولا يعلم ماذا حصل ، اخرون يفعلون اشياء مختلفه .... صفاء ماذا تفعل ؟

[صفاء الايمان]

^__^

1- يبدوا انك تتكلمين عن الماضي وكانه حجر عثره ، هل يعيق هذا الحجر خطى المستقبل ؟

يلي هامني معدل التوجيهي

2- ما تزالين في اولى مراحل شبابك .. فما هو الماضي الذي تتحدثين عنه ؟ الى اي عهد يعود ؟

التوجيهي

3- يقال بان مستقبلنا يعتمد على ماضينا .. على هذه العباره صحيحه برأيك ؟

بس رحت اسجل بالجامعة بالفعل كان بحدد مستقبلي كله كانه

4- الانسان عدو ما يجهل .. فكيف تتصرف صفاء مع ما تجهل ؟

بحاول افهم استفسر واذا ما لقيت اجابة شافية يمكن اغامر لكن التاني والسؤال مش صعب

5- لكل منا تجاربه التي تثري صفحات حياته .. بعضنا يأخذ العبر من تلك الصفحات ويمزقها الى الابد ، بعضنا ياخذ العبر من تلك الصفحات ويبقييها شاهدا على انه انتصر ، البعض الاخر يبقي الصفحات ولا يعلم ماذا حصل ، اخرون يفعلون اشياء مختلفه .... صفاء ماذا تفعل ؟

بحسب الصفحات
في ذكريات بضل حلوها او مرها
في منها اخدت العبرة ومزعت الصفحة
وفي منها تركت الصفحات بس لاشحن حالي اني تغيرت للافضل

[أحمد أبو زنط]

جلستي في غرفة جدرانها بيضاء ... وبيدك ريشة فنان ومجموعة ألوان ..

ماذا سترسم صفاء أو ماذا سوف تكتب ؟

[Essa Amawi]

^^

1- قلتي بان معدل التوجيهي اثر على خيارك بالجامعه .. بل لربما انه جعله صعبا ، هل لك ان تفسري قليلا :
أ- هل كان هذا سيغير الجامعه التي تدرسين بها ؟
ب- هل كان هذا سيغير التخصص خاصتك ؟
ج - امور اخرى تريدين قولها ؟


2- انت الآن في الجامعه وتدرسين ، بعد حصولك على الشهادة الجامعيه الأولى ستذهب ذكريات التوجيهي الى الأبد لان معدله سيصبح بلا قيمه ، فلم تصرين على انه عقبه حتى هذه اللحظه ؟

3- كل تنظر صفاء للجامعه ؟ كيف تعيشين تلك الحياه ؟

4- هل يؤثر وجود والك ضمن الكادر التدريسي للجامعه في حياة صفاء الجامعيه ؟

5- يبدوا انك تنتظرين ايام الدوام الجامعي بفارغ الصبر ؟ لم يا ترى ؟

[صفاء الايمان]

جلستي في غرفة جدرانها بيضاء ... وبيدك ريشة فنان ومجموعة ألوان ..

ماذا سترسم صفاء أو ماذا سوف تكتب ؟

تعال شوف حيط غرفتي
من ليلة ما دهنوه رجعت تحفتي بس لافضى بورجيكم بس اصوره
انا عندي فراشي " بنام ارضي " عندي قلم احمر وقلم اازرق وبحب اكتب اسمي ع الحيط كل يوم بطريقة بالغالب والمزاج
بحب اكتب اسمي وارسم ورد جوري ابتكرتها وانا بالروضة كنت انا واختي ع اللوح تاعنا بنلعب مين رسمتها احلى هيي بترسم وردة جوري قلتلها طيب رحت اجيب لالي كاسة مي من المطبخ وانا رايحة شفت على بلوزة لماما نص دائرة " هلال " خطر ببالي ارسمها واعمل عليها اكتر من هلال بتطلع وردة جوري واعملتها اختي صارت تحكيلي غشاشة وابصر شو ههههههههههه عشان انا فزت وكانت تاعتي احلى
ممممم بس عشان شو حرسم او شو حكتب
يمكن افكر اخليه نظيف ومرتب
وممكن ارسم اشياواطفال بحب ارسم بنات صغار مع لعبهم زي هاي

[صفاء الايمان]

^^

1- قلتي بان معدل التوجيهي اثر على خيارك بالجامعه .. بل لربما انه جعله صعبا ، هل لك ان تفسري قليلا :

أ- هل كان هذا سيغير الجامعه التي تدرسين بها ؟

كتييييييييييييييييييييييييييييييييييييييييييييييير
يعني لو معدلي عالي زي اختي كان رحت ع الاردن متل اخواني بالاردنية ادرس

ب- هل كان هذا سيغير التخصص خاصتك ؟

يمكن

ج - امور اخرى تريدين قولها ؟

كان غير طموحي وشوي من اهدافي
بس حاليا انا رضيانة بيلي الله اعطاني اياه الحمد لله

2- انت الآن في الجامعه وتدرسين ، بعد حصولك على الشهادة الجامعيه الأولى ستذهب ذكريات التوجيهي الى الأبد لان معدله سيصبح بلا قيمه ، فلم تصرين على انه عقبه حتى هذه اللحظه ؟

حاليا لا بما اني اجتزت السنة بالجامعة بس انا قصدت انو كان عقبة باول التسجيل
ما اظن في بعض المؤسسات بتنظر لمعدل التوجيهي كمقياس
بتمنى اني ما ااواجه صعوبات بكفيني

3- كل تنظر صفاء للجامعه ؟ كيف تعيشين تلك الحياه ؟

اه الجامعة
ممم سنة اولى رائعة حسيت بالتزام اكتر
سنة ثانية بلشنا نشوف اشكال والوان اكتر وتعامل الطلاب في منهم محترم وفي منهم ...
ممم الاهم انو انا كيف الحمد لله كصفاء ما لقيت هالصحبة يلي كنت اتمناها للاسف تفكير البنات يلي التقيتهم مش بالمستوى يلي انا بتمناه لسا لسا
عادي جدا
دراستي اهم شي

4- هل يؤثر وجود والدك ضمن الكادر التدريسي للجامعه في حياة صفاء الجامعيه ؟

شو هالاحراج
ممممم مش يعني باثر بس بحفز اكتر وبخليلي اخاف عند علاماتي وهيك بحب يضل راسو مرفوع فيي ومبسوط مني ويفتخر اني بنتو
وانا كتييييييير بنبسط بس نلتقي بالجامعة صح في طلاب وطالبات بحرجوني وهي عشانهم طلاب بابا وفي منهم ثقال دم بشكل بس احلى اشي بس التقي معو بالمواصلات عشان يدفع عني الاجار


بجد بفتخر انو بابا هوو بابا لانو رائع ومربي ناجح

5- يبدوا انك تنتظرين ايام الدوام الجامعي بفارغ الصبر ؟ لم يا ترى ؟

اشااااااعااااااااااااااات لالا مش كتير
بس بحب عشان اشوف صاحباتي
الشغلة مزاج والله
ممممم بحسب همتي برضو وتحضيري
بحب اروح اناقش واشارك لاركز بالمادة


تفضلو غيرو ؟

[Essa Amawi]

الله يعطيكي العافيه :

1- صفاء وهي ترسم يوميا - كما قلتي - على جدار غرفتها ، هل هي تطبق السر الروحي المتمثل في تفريغ الطاقه عبر القلم ام ماذا ؟

2- من الهوايات الغريبه قضيه الرسم على جدران المنزل ، فما سر هذه الهوايه ؟ الا تغضب منك امك مثلا ؟

3- منذ متى وصفاء ترسم على " الحيطان " ؟

4- لابد ان هناك ضيوفا يدخلون الى غرفتك ، ما هو انطباعهم الأول ؟

5- ممكن صوره للجدران مثلا ؟