حكمة القرعة ..

Tommywarsong · #1 07-29-2010, 04:10 PM

حكمة القرعة ..

كان في راعي ،، ماشي بيرعى بهالغنمات ،، و كان هو ماشي ينكش الأرض بالعصاية يلي معه ،،، و هو عم يعمل هيك لقى جمجمة مدفونة بالتراب ،، اجا حفر عليها و حطها على الأرض قدامه و ضربها بالعصاية و سألها : (( شو جابك هون يا قرعة ؟؟؟ )) الجمجمة ردت عليهو حكتله : (( الطمع )) ،، طبعاً الراعي خاف و هرب و أبصر شو ،، لكن بعدين رجع أخد الجمجمة معه على البلد . و صار يسولف للناس انه معه جمجمة بتحكي .. و ما حدا صدقه ،، حكوله يا انك مجنون يا بتتهبل علينا قاعد ،، قال جمجمة بتسولف .... شف هالسوالف الفاضية .. المهم حكالهم أنا ما بخليها تحكي الا ازا كل واحد هلأ حط قرش ،، المهم الناس لموا من بعض مصاري و أعطوه ،، و حكوله يلا خلي جمجمتك تسولف ،، اجا حطها على الأرض ،، و ضربها بعصايته و سألها : (( شو جابك هون يا قرعة ؟؟؟ )) ردت عليه الجمجمة و حكتله : (( الطمع )) ،، طبعاً الناس اندهشوا و صاروا يسولفوا لبعض ،، و صار الراعي هاد يسترزق من ورا هالشغلة .. و يخلي الجمجمة تحكي قدام الناس و يسألها نفس السؤال : شو جابك هون يا قرعة ؟؟ تحكيله الطمع .. و هيك .. المهم وصلت قصة الجمجمة للحاكم يلي كان ...و ودى الحراس يجيبوه .. و حكاله الحاكم : (( ولك انتا شو قصتك البلد كلها مشغولة بسولافتك و سولافة جمجمتك .. شو داير تنصب على الناس انت ... !! هات خلينا نشوف هالجمجمة )) الراعي قال : (( أنا يا عمي لا نصاب ولا شي .. و هي الجمجمة معاي لكن ما رح أخليها تسولف الا ازا أعطيتوني 100 ناقة .. و شوالات دهب .. و 300 راس حلال .. )) الحاكم قال : (( طيب و ازا طلعت كزاب )) ،، قله : (( اقطع راسي قدام أهل البلد )) ،، الحاكم وافق و خلاهم يجهزوله كل شي طلبه و جاب السياف لحتى يقطع راس الراعي حسب الشرط ..... المهم الراعي اجا حط هالجمجمة على الأرض .. و سلخها بالعصاية و سألها (( ولك شو جابك هون يا قرعا ))) ما حكت .. ولك يا قرعة شو جابك هون ... ما حكت .. يا قرعة يا سودا يا بيضا .. ما في فايدة .. الجمجمة بطلت تسولف .. اجو أخدوه لحتى يقطعوا راسه .. المهم و هم ماخدينه على الاعدام سأل الجمجمة : (( شو جابني هون يا قرعة )) .. حكتله الجمجمة : (( الطمع )) ...

يعني السولافة يمكن تكون قديمة .. و القصة مكررة .. لكن أنا عجبتني كتير .. و اجت بوقتها .. لأنه نحنا الطمع ذابحنا ذبح .. و ما منحب الخير لحدا .. و الأخ قاعد بياكل أخوه .. و الاولاد عم ياكلوا أبوهم و أمهم .. عشان المصاري .. و الناس ذبحت بعض .. و المحكمة مليانة سوالف .. كله من ورا الطمع .. ولك يا وقح ،، الله معطيك و رازقك .. شو بدك بشقفة الأرض تبعة خواتك تاخدها .. ولك يلي ما بتخاف الله يا البعيد ،، عندك مصاري ما بتاكلها النيران ،، ليش تاكل مصاري أولاد أخوك الميت .. ولك يا مصقع الوجه ،، عندك 3 تريلات ،،، شو بدك بتاكسي ابن عمك تلف وراه .. ول عليكو شو طماعين .. يا رجل .. طماعين قسماً بالله .. بتلاقي الشب مخبي دخانه و نازل يدخن من الشباب التانيين .. هيك بس كسبة .. بتلاقي الواحد معه مصاري الدنيا ،، و ازا حدا بده منه قرش أحمر بيعله لحتى يعطيه اياه .. هاد ازا أعطاه اياه طبعاً ..

مزبوط ما في حد بيحكي لأ للمصاري .. لكن الواحد دايماً يحمد الله على كل شي .. و يرضى برزقته .. و ما بتطلع على رزق غيره .. لأنه ربنا مقسم الأرزاق و عارف وين مصلحة كل واحد فينا .. لكت هات فهم هالـــ *** ،،، يلا .. بلاش ما نحكي ..

ولكو الطمع بالدين ..

**Essa Amawi** · 07-29-2010, 04:38 PM

والله يا ابو السعيد ابدعت

بالفعل مقاله مميزه

صدقا من احلى الاشياء الي قريتها بحياتي

المصاري والفلوس حلوه
بس الحكمه بطريقه جيبه هاي الفلوس
بتختلف لما تكون بتعبك وجهدك عن انها تكون بالنصب او بالتحايل او او او ... الخ

ابوالسعيد يا زلمه جد انك ورده ويا ربت كل العالم مثلك ^^

Tommywarsong · 07-30-2010, 01:57 AM

حبيبنا أبو العماوي .. و شكراً لألك .. الله يجبر بخاطرك سيدنا .. ههههههههه

والله يا معلم اني بنمغص صاير من سوالف الناس .. كل واحد عامل حاله أبو زيد خالو و ما حدا بيقدرله .. و كله كوم و بالسواقة كوم تاني .. يا رجل أقلك شغلة .. قسماً بالله لو اني رقيب سير الا أخالف المشاة ..

يا زلمة نحنا شعب مدلل .. مدلل و على زناخة .. و مو عاجبنا العجب .. الله يعين الحكومة على هيك شعب قسماً بالله ..

بيعين الله ..